《紅絲絨》 導演的話

廣東話有好多同音字，而我特別喜歡業、孽、葉呢三個字，因為業、孽係佛家語；一個代表做好事，一個代表做壞事，而佢哋又係同樹葉個葉同音，而每日我經過公園嘅時候，尤其喜歡落葉，因為佢哋令乾淨嘅地下添上唔同嘅圖案。

業、孽都係人類嘅所作所為，從事香港戲劇工作20多年，我開始分唔清究竟我對於自己對於社會係做緊業定係孽？而我最近有一個想法︰我想成為一片葉，因為我feel到︰自己已進入人生另一階段，而成為葉，我，可以感受更多嘅生命力(Vitality)。

香港呢個地方，從來都係實業家嘅天堂，好少人關心我哋呢做虛業嘅人，但係我又覺得，呢個時代，呢一刻，直覺覺得，我哋嘅位置，越嚟越重要，所以亦唔好妄自菲薄︰做應該做嘅事，認為對嘅事，好似好簡單，但其實係，任何時間都唔容易。

浪人劇場嚟到第15年，做一個由自己出發嘅演出，自己做演員，呢一刻可以好肯定同大家講︰我畫咗個圈套俾自己！而當初自己冇諗過嘅，又或者，轉個方式講︰以前，我不停出難題俾我身邊一同創作嘅朋友，而家，係自己出咗難題俾自己，考吓自己，呢個演出，都算係一個「自作業」、「自作孽」同埋「自作葉」。

但又講返轉頭，有一次我睇資料，坂本龍一寫《戰場上的快樂聖誕》呢首歌係佢拍大島渚套電影既時候，喺島上生活咗幾個月創作出嚟，後來佢自己將呢首歌演奏嘅時候，每次我睇Youtube，都覺得佢好嚮往，我估佢心入面有個「景」，我都好希望有個咁嘅「景」，令表演可以重演一萬次而不老，每次有新嘅感受去不停去挖，而呢次係一個機會，可以俾我好好感受一下。

因此，我非常感謝今次團隊所有人，佢哋，令我可以安心地投入創作嘅世界，同時我亦希望大家有所體會，最終令浪人，有「家」嘅感覺。此外，我亦非常感謝過去15年嚟，曾經幫過我哋嘅所有朋友。

當然，非常之感謝Jessie，喺過去一直以嚟嘅支持及鼓勵。

亦感謝所有曾經啟發過我嘅香港作家，有啲我認識，有啲我係唔認識，但係無論如何，佢哋都係用自己嘅語言，挖掘呢片土壤，尋找呢度嘅「真實」；而我本人，亦願意透過每一『頁」(又係同音字！)，感受佢哋嘅世界，並繼續以劇場及更多有趣嘅方式，連結香港文學。

另外，因為呢個係一個關於自己嘅演出，場刊印咗一啲過去演出嘅相，我自己屋企人嘅相，仲有一啲生活照擺咗入去，等大家會更加了解「譚孔文」呢個符號係乜嘢嚟。

其中有兩篇文章，一篇係2015年應IATC邀請寫嘅，講如何改編香港文學為劇場，佢，基本上就係成件事引發點。另外一篇，係喺1999年香港演藝學院戲劇學院所寫嘅畢業論文，早幾個月搵返出嚟，再睇，我發現，原來自己一直追求嘅嘢，有部份原來一早已經植根喺讀書嘅時候，所以，我亦度感謝過去曾經教導過我戲劇嘅所有老師及同業朋友。

至於演出嘅一切，大家好好感受吧，不想說太多了，FEEL IT。

譚孔文

22/4/2021